RC Manyara aagiza watumishi wa Idara ya Elimu waliokaa zaidi ya miaka 5 kuhamishwa

Imechapishwa Tarehe: December 16th, 2020

Na: Mariam Juma,Hanang.

Mkuu wa Mkoa wa Manyara Joseph Mkirikiti amemwagiza Mkurugenzi wa halmashauri ya wilaya ya Hanang Solomon Isack  kuwahamisha watumishi wa idara ya elimu wilayani hapo waliodumu kwa zaidi ya miaka 5 kwa kile alichokieleza kuwa hao ndio wanaokwamisha jitihada za ufalu wa watoto wilayani hapo.

Kauli hiyo ya Mkuu wa Mkoa inakuja mara baada ya wilaya hiyo kushika nafasi ya mwisho kimkoa  kwa muda wa miaka mitatu  mfululizo  huku watumishi wa idara hiyo wakishindwa kubuni mbinu mpya za kuongeza ufaulu katika wilaya  

“Nimekuja wilaya hii kama Mkuu wa wilaya hii nikakuta Hanang ni ya mwisho watumishi wa idara hiyo  ni wale wale,mwaka wa pili nikiwa hapa tumefeli kama wilaya tena nikiangalia wataalamu waliopo  bado ni wale wale,mwaka huu tena mmefeli watu ni wale wale nasema  Mkurugezi hamisha watu hawa”alisema  Mkirikiti,

Alisema ili kuhakikisha wanaongeza kiwango cha ufaulu wilayani hapo bila kuwahamisha wataalamu hao wa muda mrefu bado ni tatizo kwani hata wakiwaleta Mafisa elimu wengine wapya bila wataalamu hao wa chini yake kuhamishwa bado itakuwa ni tatizo hivyo kinachotakiwa ni kuwahamisha  na kuleta wengine wapya watakaoisaidia wilaya hiyo  kuongeza ufaulu na kuacha kushika nafasi ya mwisho  Kimkoa kila mara.

Mkirikiti akawataka pia kuhakikisha wanakamilisha miundo mbinu ya madarasa  ili wanafunzi waliofaulu waweze kuingia darasani na kuanza masomo yao.

“Mwanzoni mpaka naondoka hapa tulikuwa na upungufu wa madarasa 78 tukayapunguza yakafika 15 sasa kama yameongezeka nendeni hivyo hivyo  msijipunguzie maana kule mkoani  nikiwaambia nileteeni upungufu wa madarasa mnaniambia hamna upungufu wa madarasa  na mnaupungufu wa madarasa 14 lakini mnatakiwa mjiwekee  lengo la madarasa 30 kwasababu mnasema madarasa yanatosheleza Hanang ni kwasababu mmeendelea kuwa watu wa kufeli,hivyo  kwasababu hakuna wakufaulu madarasa ndio maana yanatosha  na kama wangekuwepo kugekuwa na uhitaji”alsema Mkirikiti.

Pia akamtaka Mkurugenzi  kuwahamisha walimu ambao wamekuwa ni wasemaji wa walimu wenzao na wanaofanya kazi kwa mazoea kwani nao hao ni tatizo na wakwamishaji wa elimu wilayani hapo.

Naye Mkuu wa wilaya hiyo  Gharibu  Lingo alieleza kuwa jumla ya watoto  wa darasa la saba waliofaulu  kujiunga na kidato cha kwanza ni 4773 na wanaupungufu wa madawati 1837 pamoja na upungufu wa madarasa 30 na yanatakiwa yapatikane ifikapo January 2021.

Mkuu wa wilaya akawataka madiwani wapya walioapishwa kurudi na kujua mikakati ya kumaliza mapungufu  hayo kwa kuwa mikakati ya awali ni kuhakikisha watoto waote waliofaulu  wanaingia madarasani

“Madiwani rudini kwenye  kamati zenu  za maendeleo za kata Ili mkaweke mipango mikakati mtakayokuta wajumbe wenu wameiandaa lakini pia mboreshe na mtakapokwama tuwasiline maana sisi ni wamoja “alisema Lingo.