Imechapishwa Tarehe: September 19th, 2023
Mkuu wa Mkoa wa Manyara Mhe. Queen Sendiga amefanya kikao na wakuu wa Taasisi za Kiserikali zilizoko Mkoa wa Manyara. Ambapo kikao hicho kimeongozwa na Mhe. Queen Sendiga na Kaimu Katibu Tawala wa Mkoa wa Manyara Mhe. Dominic Mbwete katika Ofisi za Mkuu wa Mkoa.
Amewakumbusha kuwa wote ni watumishi wa Umma na kila mmoja ana umuhimu wake na amewataka kuwajibika pamoja nakushirikiana katika shughuli mbalimbali. Aidha amewaeleza kuwa kushindwa kutekeleza majukumu kwenye Taasisi husika ni kushindwa kuleta maendeleo katika Mkoa wa Manyara.
Vilevile ameeleza juu ya uwepo wa changamoto mbalimbali katika kutatua au kutoa huduma kwa wananchi katika Taasisi hizo miongoni mwa changamoto hizo ikiwa ni suala la upatikanaji wa Bima ya Afya kwa wanafunzi mashuleni, migogoro ya Ardhi na huduma ya maji. Ametaka kila Taasisi iwajibike kikamilifu.
Aidha amesisitiza utoaji wa huduma bora kwa wananchi sambamba na hilo amewashukuru wakuu wa Taasisi kwa kushiriki kikamilifu katika shughuli za maandalizi ya sherehe za kilele cha Mbio za Mwenge wa Uhuru ikiwa ni pamoja na kushirikiana na Ofisi ya Mkuu wa Mkoa kwenye masuala mbalimbali yanayo husisha maandalizi hayo.
