Imechapishwa Tarehe: November 30th, 2018
Taasisi ya kuzuaia na Kupambana na Rushwa (TAKUKURU) mkoa wa Manyara kwa kipindi cha Julai hadi Novemba 2018, imefanikiwa kuokoa kiasi cha shilingi milioni 270,973,774.48 zilizokuwa zimefanyiwa ujanja ujanja kutoka kwenye miradi mbambali inayotekelezwa mkoani hapa na kuzirejesha serikalini na zingine kuzielekeza kwenye miradi husika.
Pia Taasisi hiyo imeanzisha utaratibu wa kufuatilia fedha zote zinazotolewa na serikali pamoja na wafadhili kwa ajili ya huduma na miradi ya Maendeleo kuanzia bajeti zinapopitishwa,zinapo pokelewa au kukusanywa kutoka vyanzo vya ndani na kufuatilia mchakato wa matumizi au manunuzi unapofanyika na katika hatua zote za utekelezaji wa mradi husika.
Akitoa taarifa ya utendaji kazi wa TAKUKURU mkoa wa Manyara Mkuu wa TAKUKURU Fidelis Kalungura, amesema katika ufuatiliaji huo watahakikisha wanadhibiti ucheweleweshaji katika uanzishaji wa mchakato wa matumizi mara baada ya fedha kupokelewa au kukusanywa kwani mchakato wa matumizi na manunuzi mara nyingi yamekuwa yakiathiriwa na vitendo vya rushwa.
Aidha Kalungura amesema TAKUKURU mkoani Manyara itakuwa makini katika kusimamia hatua ya utekelezaji wa mradi ili pasitokee uvujaji au uchepuzi na fedha ili kuhakikisha mradi husika unakamilika ukiwa unalingana na thamani halisi ya fedha zilizotolewa.
Amesema jumla ya miradi 71 yenye thamani ya shilingi Bilioni 47.8 inayotekelezwa mkoani Manyara inafuatiliwa ambapo inajumuisha miradi 48 ya maji,miradi 8 ya Afya,miradi 9 ya ujenzi wa madarasa na nyumba za walimu,mradi mmoja (1) wa ofisi ya Halmashauri ya Kiteto,ujenzi wa jingo moja (1) la mazoezi VETA,ujenzi wa Ghala la kuhifadhia mazao katika kijiji cha Matufa,mradi wa mtaa wa viwanda SIDO,mradi wa mtandao wa bara bara awamu ya pili zenye urefu wa Km. 4.108 pamoja na mradi wa ujenzi wa daraja la Magara.
Mkuu huyo amesema TAKUKURU mkoani Manyara imejipanga kuzuia Rushwa kwa kufatilia fedha zote zinazotolewa na serikali,wafaadhili na zitokanazo na makusanyo ya ndani kwa ajili ya huduma na maendeleo, na kuongeza kuwa itaendelea kushirikiana na jamii katika mapambano ya rushwa pamoja na kutatua kero mbalimbali za wananchi zinazohusiana na Rushwa.
Imeandikwa Na: John Walter
