Imechapishwa Tarehe: March 25th, 2017
Mheshimiwa Waziri Mkuu Kassimu M. Majaliwa ametembelea Wilaya ya Simanjiro nakupata fursa ya kupokea Taarifa ya Wilaya; kufanya mikutano ya hadhara katika uwanja wa Orkesmeti, kusalimia wanakijiji wa Landanai,na mkutano wa hadhara katika Mji wa Mirerani.
Mheshimiwa Majaliwa katika Ziara yake alipokea malalamiko na kero mbalimbali,Kero kubwa zilizowasilishwa ni ukosefu wa maji, Kijiji cha Landanai kutokuwa na Mawasiliano, Hati asili ya madini ya Tanzanite kutobeba jina la Tanzania wala Simanjiro wala Mirerani,pia wanunuzi wa Madini ya Tanzanite zinazopelekwa nje ya nchi kutotozwa VAT wakati wanunuzi wa hapa ndani wanatozwa VAT,kukithiri kwa michango shuleni pamoja na kuwa Serikali inatoa fedha za Elimu bila Malipo na kero nyingine nikwamba Baadhi ya wananchi waliopisha eneo la EPZA kutolipwa fidia zao.
Mheshimiwa Waziri Mkuu, aliwasihi wananchi kuendelea kuwa na imani na Serikali yao kwa kuwa changamoto na kero zote walizozitoa zitafanyiwa kazi na kuhakikisha kuwa ahadi zote zilizotolewa na Ilani ya CCM zitatekelezwa.
Aidha Mheshimiwa Majaliwa aliwataka viongozi kutoka maofisini na kwenda kusikiliza,na kutatua kero za wananchi bila kuwazungusha.Hata hivyo, hakuacha kugusia juu ya vita dhidi ya dawa za kulevya na kusisitiza kuwa itakuwa endelevu hivyo kila mmoja anapaswa kupambana na dawa za kulevya sababu inaua nguvu kazi ya Taifa.
